இந்த பாழாய்ப்போன ஜன்னல்!

என் கோபத்தின் மிச்சத்தை

உலகின்மேல் உமிழ உதவுகிறது

இந்த பாழாய்ப்போன ஜன்னல்!

ஒவ்வொரு பார்வைக்கும்
உலகை நிறம் மாற்றித் தொலைக்கிறது

இந்த பாழாய்ப்போன ஜன்னல்!

தனிமையில்

என்னோடு நட்பாகி

வேடிக்கைக் காட்டுகிறது

இந்த பாழாய்ப்போன ஜன்னல்!

சமயத்தில் மழலையாக்கி

உலகை ரசிக்கத் தருகிறது

இந்த பாழாய்ப்போன ஜன்னல்!

நிலவை இட்டுவருகிறது

நட்சத்திரங்களை முத்தமிடச்செய்கிறது

மழை காட்டுகிறது

மண் சுவைக்கக் கொடுக்கிறது

தென்றலோடு காதல் செய்விக்கிறது

இந்த பாழாய்ப்போன ஜன்னல்!

தெருவில் திரியும் விடலையின்

மாமிசப் பார்வைக்கு

என்னைக் காளியாக்கிவிடுகிறது

இந்த பாழாய்ப்போன ஜன்னல்!

எதிர் வீட்டு ஆடவனின்

காதல் பார்வைக்கு

நாணச் செய்கிறது

இந்த பாழாய்ப்போன ஜன்னல்!

நோட்டமிடும் மனிதர் முகத்தில்

 அறையாமல் அறைய 

 கை கொடுக்கிறது

 இந்த பாழாய்ப்போன ஜன்னல்!

வானம் மண்ணை முத்தமிட அனுப்பும்

மழைச் சாரலையெல்லாம்

சிறைப்பிடித்து நீர்க்குமிழியாக்குகிறது

இந்த பாழாய்ப்போன ஜன்னல்!

தன் எஜமானனின் உணர்வுக்கேற்றபடி

உலகை மாற்றிக்காட்டி விடுகிறது

இந்த பாழாய்ப்போன ஜன்னல்!

எந்தப் பொழுதாயினும்

வெளிச்சமோ

வெக்கையோ

தென்றலோ

புழுதியோ

என் அறைக்குள் அனுப்பிக்கொண்டே இருக்கிறது

இந்த பாழாய்ப்போன ஜன்னல்!

என் அறை மூளையில்

நான்குக்கு மூன்றாய் சுவரோடு பதிந்து

என்னை உளவு பார்த்தபடி

உலகத்தினுள் என்னை தொலைக்க உதவியடி

என் மன ரகசியங்கள் அனைத்தையும்

படித்துத் தொலைத்திருக்கிறது!

இந்த பாழாய்ப்போன ஜன்னல்!